أشايِل بي فَرَح عَينيك تَرَح دُنياي
عَساي أقدَر واكُون خآيِل مَع السِكه العَليها خُطاي
وأمِش صابِر كمان خابِر شِنو الجَرِح النَتَح جُواي
شُنو الحارِيهو لوباكِر طَلَع بالصُحصُحُن ضَواي
وأجيك في مُقتَبَل عِشقي وأوَج الشوق
وأصابِر في تُراب راجِي السِحابي الفوق
أصنقِع للتِرَيّه يرقرِقِن عَينيّ انا المَحرُوق
أنده يامَطَر حِس الشُدَر مَخَنوق
والطين إنهَجر قُمرينا حِرم القوق
لاتَسقِي البَحر تَدشُر رِعود وبِروق
لاترمي العُشَر ورِمت الخَلا المَعَيوق
لو قوات بَشَر لابشتَهِنو النوق
ترِّع في مَتَر كاشحِلها المارُوق
وفِسراع يامَطَر صَبر الرُخُس مَمحُوق
من قَبل الفِغَر ومايَحَوِطَك مَخلُوق
أنزِل ياقَدر يارحمة الله الفوق
بَدُور ياقوس قُزح من لونا طير جَني
يزور شَبال كَشَح وَدعاتو رَجَني
جارات بالطِرَح جارات صَبق جَني
يسالمِن في مَرَح يَحكِن معاي عَني
إيدين للبَلح وايدين بيسقني
يدني الفَرَح بَعدين يَنَقِني
باب الحِن فَتَح ماسده ريح مني
وادخل من فرحتي تقول طفل مشيول يهِز بسام
فَرِع ليمون مع النَسام
اقَلِب فوق ضُهور الشوق واغني سلام
سلام يااهلي البِتَرموا السام يقوم نَفاج وصال ووِأم
سلام ياهلي البتنحَر نوق إذا مازارا ضيف في منام
سلام ياعِزه ياتاريخ وياروعة غلابه قُدام
سلام يالبَركل المسكون وحارساتنو كم درغام
سلامات يالكُرو وياخيول بعانخي الحُرّه دون لَجام
سلام يانوري والطربول ويامَروي القديمي سلام
ويارضِ قُريره وَرّت خيره بَرَّت طَيره بالأنغام
ويام الشمشِ وين ماتمشِ ليك الغيمه ترعي غرام
ونِتحرَكا تَمرُق فينا تَمرُق فينا من لاوونا من قُرقابنا من شمارنا من إحرام
من ليمونه في الاماتونج لازيتونا في أرض الشام
هَباد القَمِيري سلام سلام بالصِح سلام الله وهيط والخطوه لي قِدام
بلد زي نيلا بالا طوييل بلد حانان بلد راحام
وكَدِي فوق الرَضِي السالام
وزولا يا زولا مافي كلام
امان مو عديل امان مُو اصيل اماني واماني ماهو تمام
وامان مو غتيت ومو النَجام
إذا ضاقت خِليقتو وقام
وشعبِ متل دا لابنغَش ولابِيَهَقلو الحُكام