الضو وجهجهة التساب
وداها فوق قوز الرماد
كان ظنّ يوم .. يومين .. تلاتة
الموية تنزل والبحر يشرد شراد
يفضل ترا
يبراهو بالسلوكة من ورا
والعيوش والخير يعم .. يرقد رقاد
والناس تخم خم السرور .. وماهو البرا
ناساً كتار .. فاكرين كدي
يومين .. تلاتة .. الحالة ترجع حالتا
ويبنوا البيوت هو وشفعوا .. وأم العيال
وينجمعوا .. ويسترجعوا الذكرى وشتاتات السواد في صالتا
شيتاً ضحك .. شيتاً بكي
ويبقى الخراب ده رهاب .. رهاب
عبرة وحكاوي بتنحكي
بلدك متل كمين بلاد .. بدت الدقون فيها الختا
نجّس ثراها المسرفين .. كترت مواعين الفساد .. وكان كلمة الإسلام غُتا
جات اللّت الله .. وشالتا
كان ظن يوم .. يومين .. تلاتة .. مشى السبوع .. والتاني جا
والموية كل ما ليل تزيد .. ويقل رجا
وقوز الرماد الكان قريب .. فات بعيد .. بقى ما بتخوج
قوز الرماد يا الضو فضل .. جزيري ضارب فيها موج
حصار .. حصار .. كيف النجا
عاين البلد دي دمار .. دمار .. فيها إيش فضل
لعبة قصب في إيدين طفل
الحيطة وكتينا التقع .. تقع ألف وجعة على الضلع
دخانا يمرق في السما .. آهاتو تنزف في الأرض
بحر الصبر والإحتمال بيناتن إنقطع ترع
لا يلقى يربط لا يحل
لا حولة يا الكتب .. الكراريس المكرنة في الشتل
التختة .. أقلام الرصاص .. كنب المدارس كوز يلوج
باب الفصل كاسحبو موج
لا قوة يا ورق الجرايد .. يا المصاحف
والصحيحات المطفحي في الزبل
ورافعين دواليبن بعيد .. طابلين خوازيقن طبل
لا حولة حال .. ما بتنقبل
يا مسلمين .. وين لي تساب عشرة .. وتساب كم واربعين
ده يمين خراب كمين سنة
يا الضو منو الفي الكون بصدق كان هنا
ليلة ذكر .. حلقة مديح .. دارة غنا
هيصة ورقيص
القرمصيص
سيرة عريس .. وحلاة عروسو محننة
يا الضو منو الفي الكون بصدق كان هنا
شفّع بيلعبو جنب بعض .. ديك لِفّتُن في الدشي غبشي مشكنة
واللا الشتل خايف لها .. فارد جرايدو وحاضنا
فيق ... لا تضيق
بات الفريق بهجي ومتمسحة بالمني .. وين يا الضو نقاقير الهنا
وينن مشاوير الفرح .. غزل البنات .. الهودنة
حش البراسيم العصر .. الليل ونستو الشيطنة
وعند الفجر .. كم ميضنة
وهذر التلاميذ الصباح .. بي جنب رواكيب الحلب
يا الضو بيوت الناس .. حياتا مبشتنة
الحلِّي كلها في البحر
كسر البحر .. ؟
واللا انتحر ؟
قلب المياه إنكبّ قبلك وحدك
ضاداك في بلدك .. شردك
نفدت قوافل الأغنياء .. جملك على الضانقيل برك
مرتاح حمامن في البروج
وإنت اب حماماً طاش يلوج
لا سوى عش .. لا ركّ ركْ
يا الدنيي كيف متقلبني
تصحى العصافير الوديعة مع الصباح متخلقني
شر الكلاب متمسكني
وين (جنرتا) وهوهيوا وين ؟ الليلي غابْ
كلب الجناين زيو زي كل الكلابْ
كلب الغلابة المستغلين العبيد .. الليلي سيد ريس مهاب
كلب أب زهانة تهينو هانة .. من المهانة تقول له تكْ
حكم إنقلابات التساب ..
دوارة دنيا فرندقس
ننجارى فيها صبق صبق ..
نخسر بعض في هين تراب نتلاوى عِنْ فتح اللبق ..
فاكرين برانا أهل العقاب ..تاري البحر عوافي عندو معانا حق
يا الدنيي زي سكرة وتفك .. من راسو فك
بعض المسافات إتلغت
الفارغي طمبجا .. والملاني إتفرغت
الدندهوبات زي بعض .. شكل العديدي ورصّها
نفس العناقريب نفسها
عفشك ده .. حق غيرك تشك
يدخل في بالك ألف شك
ما الحالة أصلاً من بعض
كل إنقلابات التساب .. الدنيي كلها حلتك
تنضم مع الفي آخر البلد .. من غير تفوتا محلتك
تحكيلو قصة تقصها
إن نفسو فيها تحسها
إن ماها فيها تحسها
حتى الأحاسيس نفسها
ما الحالة كلها من بعض
إلا المساخيت الدقون .. ختوها بين أهلك قرض
بالدين وبالطين بالنسب
بالمايكرفونات بالخطب
بالبنطلونات بالرتب
(فرق تسد)
تاخد قناديلك تفوت .. ينكتلو في حزمة قصب
ويوم التصد .. تلقى البيوت في أزيارها باني العنكبوت
والجزمة شاهد في الترب
حرسك يظمبر منها
وفرسك يكد..لا أسيدها تسأل عنها.. ولازول يرد
أرخيلى أضانك يابلد
مرة أسمعينى من البعيد وإنطارشينى وللابد
فى حبلى ماتت شتلتى .. مات بيتى ماتت حلتى
لكنى يوم ماتو إتولد جواى الف عشم جديد
وانا ذاتى من ذاتى إتولد
ورتنى ملتى ملتى
والمويه بدلت الوجوه
يابلدى من بيتك تتوه
تضهب ضهب
لو بابو مافى أو العتب
تحسبلو من قوز الرماد
أو بيت أمير المؤمنين اللسة حيطو تسوى رب رب در.. درب
والدندهوب إندك دك
هرس القزاز .. الموية جاز .. والجاز ودك
بينو الدقيق إتلك لك
ضلف الدواليب الكبار .. عايمات خشب
المكحلي .. الكتشينة .. ميزان الدهب
ضوق الغضب
ضوق المذلة الدستبا الناس العزاز
سيدك دخرنالو المطر .. اما إنت يكفيك الرذاذ
ويجى الجراد ... ويجى الجراد
خدرت تاني يجي الجراد
أقوى الحقيقة من المجاز .. وهنا المحك
يا أرزقي .. يا نسل حمالة الحطب
يا مستفيد من بزة أطفال السواد الما نزل فوقن ملك
بالسكر .. العيش .. السماد
الموية أولى من العباد ؟؟
في يات كتاب دين .. يات حديث
يا فاجر الله بيسألك
يا حسرة الإنغشى فيك .. كبر وراك .. جاهد جهاد لامن هلك
يا حسرة الصدق صلاتك وموعظاتك في الفساد .. بان الشرك
ايواتا لك .. ايوة ايوة يا بحر التساب .. ما أعدلك
شكراً جزيلاً يا بحر .. رغم الكساد
بحت لنا العفن المكرن في الزمن من عهد عاد
والضو وليداً ما قرا .. خرجتو منك باقتصاد .. قانون .. فلك
جف المداد .. ما أعدلك .. ما أعدلك .. ما أعدلك
بالسكر.. العيش .. والسماد
الموية أولى من العباد ؟؟
يا شارع الثورة القصاد أهلي المسالمين البعاد
يا بندقيتو .. هنا المحك
قبل على القبلة ونده
قبال يمد إيدي إنتبه
حس المطر بين الشدر
والضو مع الفيها إنشده
برة المطر .. في الدندهوب برضو المطر
خت البرش فوق راسو .. لكن المطر أوووو والهوا
راس تمرة فوق عفش المسيكيني الجريد
رمى دندهوبا العدي فاتت بالبحر
برش الصلاة اللافحو الهوا
إبريق يترتر بين ككر
يا الله .. ستها في السفر
والضو ينط من دندهوبو يجيبو صاد صوت المطر
في إيدو كوز .. سبحي .. وككر
حلة ملاح .. كراس غنا .. إعلان قضية .. علم طلب
برواز قديم ..
حاضن عروس وعريس وسيم .. بين كم نفر
السبحة والكوز مو اللتا .. تشبه أمير المؤمنين
باكر يقولو سرقتها .. فننن .. يفنها في البحر
أقوى البحر ؟؟ واللا المطر ؟؟ أو الرياح
بتصحي في الجو الجراح
بتحت من الجوف الفكر
يشفي الوعر
عش قمري بي فرخينو كان من حظ ورر
يا رازق الحيوان أخو..
الينجا من كيد البحر .. ما ينجي من إيد المطر
والينجا من إيد المطر .. ما ينجى من كيد الرياح
والينجا من كيد الرياح .. ما ينجي من كيد الفقر
يي دي القدر.. يي ده القدر
ما أعتى حربك يا بشر
إنت الغريب .. والموج يشيل غادي ويجيب
وينكربش النيمة الدبيب
والضو مو جايب لك خبر
طق .. دندهوب ناس ستي نور .. عودو انكسر
وفات بالبحر
تحت السموات مافي إرض
في الموية .. في الريح .. في المطر
في الدابي .. في التمر الختر
إنسان يطق قبل السنة .. عراقي والوشي .. والشعر
غير وقفتو .. الدندهوب زالف هبر
يا غيمة هووووي .. ده وكت مطر
وارتج جوف الجو رعد .. يا الضو كفر؟؟
يا الضو كفر ؟؟
من بعد ما نفد الصبر .. والإحتمال في الجوف دشر
صن المطر .. والجو صفا
بنقر حجر بت الرسول .. لكن بعد ما الضو كفر
ضربت شعاعات الشمس .. في دوشة فوق قوز الرماد
كلبة مديني .. نعيجتا
ديكا العجوز .. وكديس عماد
وطيرة بقر .. ودحيش غريب
شوف الظروف .. دحشك .. حمارتك والضيوف
قلعن .. يحفتن في الرماد
بالسكر العيش السماد
الموية أولى من العباد ؟؟
وبالفيتريتي العيش حكم
الموية أولى من البكم ؟؟
وملص العريريقي ولباسو .. ومصرن
ما غيرن
خمخم عقاب الكسرة واللابري القديم
من دندهوبو المنتكل .. في النيمة شال باقي الأكل
خم الدبيب في القفة مو جايب خبر
خم الرياح .. خم المطر .. خم الجراح
لفالو فرعين منقة بالمنجل هبر
حشحش صبايتاً مو صفر لكن غلاد
اللسة بدري علي الحصاد
يا الضو بقالن اعزَ زاد
ونجاضا زاد
وبين الضبابين والنمل
نام نومة الديك في الحبل
صحَّاهُو آذان العَصُرْ .. يا الضوْ مَفوِّت كمْ وَكِتْ ؟
نَقنـقْ بَراهُو تِحِتْ تِحِتْ
رقْــرقْ دموعُو لَبق تَحِتْ
صلاَّيْاً القرآن غناه
صلْ يا حمام قِدَّامي أنا
غرقان لِي فِى أنجاسْ لا هِنا
ما شال مراحيضنا البحر
طفَّحْ زَفارات كم سنة !
مِرحاتنا والكُوشْ القُدامْ ماصِن وَكِتْ ماصَ الهَنا
تقنت خَبُوب
تحت الهَبُوب
كُل الديار
تقضف خنّا
بى ايه إغتسِلْ ؟
وإتوضأ بإيه؟
غير الصَبُرْ ... يا ربَّنا ؟
غمغم بكى
بكّاهُو .. خَلَّ البال نَبلْ
قُولة عقابَكْ في الجبل من زيْ دِي بشْرَبْ يا جَنا ؟
هُونَق دِحِيشُو .. الضوْ بكى
بكى ما بكا
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين وحبيبي وُوُوب !
والباقي كلُّو مقابلات ..
والنشرة مافي ولا خبرْ عن بلدُو .. عن شِدَّة عَناهو عن البحر
عن سر نَفي ..!
ودِي الوكْتِ لندن ماب تبين ..
حالاً دَحِين زيْ حالُو فِي .؟!
يا الضوْ
قَبُلْ غِيبةْ الشمشْ
قَبْل القَعُو قبْل البعوض قبْل الدَعَتْ
والمُويَة كُل ما لِيك تَزِيد .... والزَاد نَفَدَ
قَبْل الحِصار يا زُول أخير تَخَتَا البَلَدْ
يا شيخ قُعادكْ شِنْ يفِيدْ ؟
شِنْ حارسُو شِنْ خايف عَلِيه ؟
أكترْ من الطين الوقع في الطين شهيد ؟
صُور التَمُرْ .. يا الضوْ أمِشْ
عِينْ الشَمِشْ .. يا الضوْ أمش
البُرْتُكان والمنْقَة والنِيمْ تِنْطَقِشْ .. يا الضوْ أمِشْ
الدنْدهُوبْ .. يا الضوْ أمِشْ
حَدَرنلومن قوز الرماد رَمَن الرِمشْ .. قالنلُو أمش
قبْل الحصار .. يا الضوْ أمِشْ
نَبْيَ الله نُوح .. قالك تَمِشْ
من ضو ترُوح .. يا الضوْ أمِشْ
يا زُول قٌعادكْ شِن بفِيد
شن حارسُو شِن خايف عليهْ ؟؟
دكَّانك الغاية العَرِشْ ؟
دولابك ؟
العَفَشْ الجديد ؟
الحافلة ؟
بيبان الحديد !
توَلِيتكْ البايرَكسِ !
إيه خايف عليه !!
أكتر من الطين الوقع في الطين شهيد ؟؟؟
داك الفَرِشْ
والعدِّى في السحَّارَة .. خُتْ فُوقَه البِرشْ
من ضو وأمِشْ
عارفين قليبك طبعُو حار
وبيَهِمَّك الروح مو القِرِشْ لكن أمشْ
في الفيها ما عندك خِيار غير ما تَمِشْ ؟!
إنسان معمَّرْ بالحياة
لا ترْمِي نفْسكْ يا حِمِشْ للتهْلُكَة .. خلِّينا أمِشْ
شِنْ حارسُو ؟
شن خايف عليهْ ؟
أكتر من الطين الوقع في الطين شهيد !؟
وملَّـس دِحِيشُو
الضوْ بكى
بكى ما بكى
بكَّاهُو حسْ الطائرات
بكَّاهُو قُدْرَتُو تنْتَهِي
بكَّاهُو يرجَى المعجزات
بكَّاهُو يقْنَع بالرحيل
بكَّاهُو ما كان الشُدَرْ .. ما الطير .. وما كان النخيل
بكَّاهُو كِيفِنْ سَدْ شِبِرْ من مُويه يصْبِحْ مستحيل ؟
بكَّاهُو يَلوَط في البحرْ .. والغِيرُو يشربُو سلسبيل
بكَّا البِينضُمْ في الغَلطْ .. يا قالُو مُلحِد يا عميل
بكَّاهُو آه
ما هُو الإله
؟!؟!
يا دَكَّةْ السُلْطَة
ودُخانه .. وشمْلَته
وفي شرْعَك الإنسان يموت
كان زادت الموية ويموت من قِلَّته
إن سامحك في حقُّو .. سِيدي العُمدة
هُووي
تبْ ماب تسامحك بِتْ أبوي في شتْلَته .
يا مَسَمِّي مِحْنَتنا
إمتحان !
مرَّات قَدَرْ !
حِيناً غضبْ !
ناكِرْ جِبِيهاتنا .. وصلاتاً صلَّته
يوم يمْحَق الصاح الخطا
وين تمشي من غضب الغلابة اللا بَكتْ لكْ نازِلاتَه ولا شَكتْ لكْ عِلَّتَه
لمْلِمْ خُرافاتكْ علِيكْ
ما حرَّقتنا ضَرِبةْ إيديك .. بسْ روحنا حَقَركْ سلَّتَه
وبِنَجِيبَه ضرْبتْنَا وتَصِيب في حَزَّتَا
وفي حَزَّتَك يا بيتنا كَبْ
ويا بيت أمير المؤمنين إنت اِتْنَـكبْ
والضوْ شَطَبْ جِيهةْ اليمين
حجَّاً إلى ان آمنين
وبين بِدمُو البسملة
وبي خط خَلاَوِيهُو المَكعْوَجْ والحَرِفْ واضِح تَخِين
بي دمْ و طِين
الضوْ كتب فوق باب أمير المؤمنين :
(ما ضرَّ بيتَ أبي لهبْ لوظلَّ بينَ المسلمينْ
لوْ جاء فينا لِما ذهب يا مؤمنينَ بغير دِينْ!)
ومَضَا اِسمُو بين قوسين "غضب"
والمويَة أوْوْوْوْ .. أو كاللظَى
رَمت الدهاليز والأوض بسْ فضَّل الباب العِظَة ؟
والضو ضحك
ساعةْ وداعُو بِقَت طَرَبْ
غنَّـَّـى وضَرَبْ بي طُوقُو عند ساعة العِشِي
بانتْ نِوِيرَاتْ العربْ حَزْنَانِة غَبْشِى مَدَعَّشِي
حِسْ الصُبَارْ في المُويَة
والقّعُو
والمِعُوزْ
طَرَّاهُو للديك العَجُوزْ
يا الضوْ يجُوزْ ينْجَى ويَجُوز
الصَبَرَة كَمِيرْ كُوْ كَوْ تِنْعشَّى عَشَاهَا مِنْ ضَوْ
الصَبَرَة حَرَامِيَّة وأشوْ فِى حبال خاذوقة إتلولوْ
لا ترمي دموعك شوْشوْ
قــاوِمْ والمـُرَّة بِتِحْلوْ
ترف إستخباراتُن أوْ .. صَاجْ الْدَبَّابَة الكَََرَرَوْ
ضَنَبْ الطيَّارَة الْفِي الجوْ
الترْمِي قنابل بوْ بوْ
كم يبني بلادك من الضو وكان بحمِي وِلادك آآ الضو
الينضُمْ طوَّالِي يسوْ
والضوْ بكَى .. فُورَنْ وَشِي
من شُوقُو .. ولاَّ من العذاب الفوقُو
ولاَّ من التَعَبْ غالبُو المشِي
وكلْ فرْدِة جَارَّهَا من بَلَدْ .
يا الضوْْْ سلامتك جِيت مِتِينْ ؟
سِبْتُوهَا وحَّدّا للدَعَت
سِبْتوها وحدَّا يا الخزين
سِبتْوها وحدَّا للبعوض
للطير ودبَّايْ البحرْ
نُونِي الضَبابِين
الكلابْ الجِنْدبْ
الفار
السَعَرْ
يا الضوْ بلدنا وودَّعَت
راحتْ شتُول دُوب فدَّعت
فاتت بيوت ما ضاقت الزِينْ والعَدِيل ما اتمتَّعت
ضاعت سعايات إنْسَعت
يا الضو تَليِّسُو بالقُفَاف آخر المطاف شمْلَةْ كِنِيشْى اِتوسَّعت !
حِلْتنَا غِرْقَت ، ومن طَرَفْ
حلتنا غرقت ، وفي شِبِر
غَرَّقْنَا يا الضو صِح سَرَف ؟؟
العلمتنا العُوم تقُوم تَغرَق هِي ما تقْدَرْ تعُوم ؟!؟
يا للأسَف
عزَّ المَصاب
البَرَكَة يا الضوْ في الرُقاب
إلاّ الرقاب إنُجهْجَتْ
ما جاته راحةً من كُتُرْ ما انْجيْهَتْ ما دام معلَّقَة في التراب
صَنَّت
شِويْتِين .. نَهْنَهَتْ
خايْفَاك يَهَقِلَكْ السرابْ يا الضوْ يَهَقِّلْنا السراب
واِنأوَّهَتْ
والضوْ صنم ، ما جاب جواب
لا زاتَه هِي اِسْتَنَّت جواب
أمُّونَة وِينَه ؟
مع العَوِين في المدرسة
أمِّك مَنصَّحَة؟
حالة زين في المدرسة
خالْتِي الزِلال ؟
في المدرسة
جِدِّك حسين ؟
في المدرسة
السُكْنَة كيف ؟
في المدرسة
العِيشِى كيف ؟
تسْعَل سُعال ؟ يا الضوْ تقول تامْ لَكْ سَنِي
تسعل تقول ماك من هِني ؟!
شِنْ السُعالات ينفعُوا
ما حال غلابى علي غلابى إنْفَرْزَعُوا
فتَحُولُن الغُبُشْ القلوب .. قبْل البيوت
قَسَمُوا القِليْلِي معا بَعَضْ .. كم طمَّنُونا وشدَّعُوا
لكِن دَوام الحال محال
وعلى العموم ما مرَّ يوم ما جاب هموم
هَمَلِي ونِقاراً تسْمَعُو
واحدين يقُولُوا لك خلاس .. واحدين مُصِرِّين يرْجَعُو
وإن جيت بلدنا مُطَمِّنَة
بَسْ كيف يا أخَيِّي نأمِّنَا
قبل البحر من ها الفِقَرْ
فِقَراً ضُعُفْنَا مَسَمِّنَا
الفى العروق دا مُو دمِّهُن
دمَّك يا أخيِّي
ودمِّي أنا
الَنَار تَقِيْد فِى الَكَان سَبَب
يَا الَضّو بِيُوتَنَا يَوقِعُو
نَهَجِر بَلَدَنَا نَزِح هِنا الله يجازى الكان سبب
كان سُلْطَة ينْسلّط عَلِيها أكَّان لِجانَّه يلجِّنه
وبِي تُوب وَكِت نَزَحَتْ حِرِقْ
قشَّتْ وَشِيها من الأسَى ومسَحتْ قفا الضو العِرِقْ
عَصَرَتْ علِي طَرَف الطَرِيق عَقَدَتْ سِفِنْجَتَه بي دِلِقْ
وكُلْ فَرْدِة كانت من بلد ويِنْشَافَنْ الإتْنِينْ خَدُرْ
اللِيل سُتُرْ .. الليل سُتُرْ
سَرَحَتْ مع الخاطِر بَعِيد عَكْسَ العِرِقْ
شِيمْةَ التَهاوِيم شالَتَا
هَرشت كـُتر
نِحْنَ وقَدَرْنا قَدُرْ قَدُرْ
نَصْبُرْ صَبُرْ
نصبر على البُوخْ الغَريبْ
نِسْتحْمَلْ أصوات القَعُو
لامِن نلاقي الهَمْبَرِيبْ
والليل غَناوِي نَوَلِّعُو
يا يُمَّة تَفْرَحِي من طَرَفْ
عاد والمسافرين يرجعو
دَه كأنُّو لا دمع إنزَرَف
لا خيوط قلوب إنقطَّعُو
لا شتلة لا محْصُول تلَف
لا ناس بيوتن وقَّعُو
بحراُ بَلا الخازُوق زَحَف
نبْنِيلُو قِيف ما يطلَعو
صُدْفَتْنا تبقى آخر الصُدَف
نمْسِك زَمنَّا نَطوِّعو
يخَتُونا يمشوا يَوَدِعُو فقَراً علينا إتْرَبْعُو
ديل لاب يخافوا من الإله
لاب يختشوا ولاب يشبعو
حقَّاً تحرسو ولاب يجِي حقك تلاوِي وتقْلَعو
أمْسِك شُباطين الصراع الماب تحصِّلُوا فلِّعُو
ثبِّت لي بالك لا يلين أنْقَحْ ترابك وازرعو
عُقْبان أبو الإنسان حنين ما شقَّ حَنَكاَ ضيَّعُو
سَرَحت مع الخاطر بعيد
عَكْسَ العِرق شِيمةَ التهاويم شالَتَا
دَقَشَتْ طَرَف قوز الرماد إنتَرتعتْ
كادَن عيونا يَوِقِّعُو
رجَفَتْ
صِحَت بي حالَتا
صدَّابَه تيَّار البحرْ
كان أقوى من بالَه النّزَف
وكان فرحةْ الناس الأسَفْ
الهمبريب
البوخ
غِــنِيوَاتَ القعو
وصنَّت بِنيْةً جَنْفِي هيل بِت السَرَفْ
جمْ كُوم وِلاداً يقْطَعُو
فوق البحر .. فوق اللجان التاني جاتْ
فوق الفِرَج والبشْتَنَة
الحالة ما دارت بَحِت الحالة ظاهْرَة وبيِّنَة
السُلْطَة عن غرق البلاد مسئولة هِي
وفوق عِينَا حقَّنا تدْفَعُو
وبلدك حِمايتا مُمْكِنَة
أصْلُو اِحْنا لازمنا امتداد
قُبَّال بيوتنا يوقِّعُو
كُنَّا بنقوله وتلْكِنَه
حيكومة دايْرَة تَلَجِنَا
تدِّينا مشروع نزرعو تدِّينا جِيهةً نسْكِنَه
لوْ وقْفُوا الحرب الحرام الـ الله ذاتُو هُو لاعِنَا
كان البلاد إنطامَنَت
كان النفوس انطامنت
كان ألْفِ خزَّان اِنبَنَى
يكْفِينا ذِلَّة ومسْكَنَة
كانت زمان السرقي دسْ الليلِة عِينك مُعْلَنة
وفِرجاً قِبيلْ بِنَشوفه عِيب
عينك عِيانى مَقَنَنَة
باسْمَ الرَصيف والمارصيف
كم بيت وصالون اِنبَنَى
كانت شعاراتُن وعود صارت مُجرْد عَلْقَنَة
وبين الدقون والدلْقَنَة
كل التقول موساك تقوم تلقاهو ربَّ الفرْعَنَة
والجايِي أعتى من اللِي فات
الجايِي أعتى من اللي فات
والضو تَنَى
وعضَّى اصْبَعُو
عضَّابو حِسَّّ الطائرات
عضَّابُو قُدْرَتُو تنتهي
عضّابو يرجى المعجزات
عضّابو صبْرُو وطول رَجَا
وَيْْ أبونا جا
ويْ يا القِمِيرة أبونا جَا
وجرُو كالفراشات شُفْعُو
جرو منُّو غادي وفلعُوا
أدُّوا البحر .. أدُّوا الحجار
ساعةَ الحَضانقُيل يجْدَعُو
برَّاقْ عيونُن يشْلَعُوا
تالا القميرا يصنْقِعُو
"يا الطالع الشجرة جيب ليْ معاك خِيمة
تستُرْ من المطرة كان كبَّت الغيمة
جيبلك معاك قمحات
قمحاتنا في الشيمة
وغنم الحَلِب رايحات
ضلَّمْنَا ضِلِّيمة
خيمة الشحودية دَفو ماب تَدَفِيكا
لبن اليهودية بلدك ينسِّيكا
قمحاً من امريكا خاذوق ضرَب فيكا
غير خير بواديكا مافي اليكفِّيكا "
"يا طالع الشجرة من خيمتك التوبة
جيبلك فروع خدرة أو جافَّة يادوبة
في الحرَّة في المطرة في عِزْ بَرِدْ طوبة
نمْرُق مـن الوَكَرة وتبْقالنا راكوبة "
"يا طالع الشجرة قبِّل على الحِلَّة
قول ليها يوم بكرة كُـرْبتْنا تِنحلَّه
ننزِل نضوِّيكي ضِرْعاتنا مادِلَّة
قادرين نسوِّيكي وعُقْبان عَلِي الله "
"يا طالع الشجرة
طوْلنا يا ولاّ
أنزل هيا
ويلاَّ
إندلَّى نِنْدلَّى
نِنْدلَّى حلتنا
حلتنا مادِلاَّ"
نندلَّى ما دام الأسف
والجهجات ماب ينفعُو
ثبِّت يَقِينك يا ولد
الناس مصيرُن يرجعُو
ما شال عزيمتنا الهوا
والبنْدِقْ المعزُوق سوَا
مافي أييِّ ريح بتفرْزِعُو
إنت وأنا
نار السعف كان ولَّعت بيناتنا ما تِسْتهْوَنا
الجوْ شرارة تَوَلِعُو
الزول بَحِنْ
حِنّ يا ولد
حِناً يقَدِمَك أتْبعُو
وتِشْ عينو دجَّال الضلال
قبَّال يَمِدَ لك أصْبَعو
حِنّ يا ولدْ
والضو يقالد من طَرَفْ ناس البلد قبَّال يقالْدُو يَدمِّعو
دمع السواد الانزرف
لوْ الدموع بِيَرَجِعُو
في عَمَّة
في بِتْ
في ولَدْ
شمََّّ البلدْ
ضمَّ البلدْ
ناضَمْ قبيلتو ووانَسا
هبْهَبْ دموعُن ويبَّسا
نقْنَاق حِبَيْبِين القَسا
طرَّاهُو حِس الطائرات
والضو نِسى
قوز الرماد بالفيهو
فوق قوز الأسى
الْفي المدرسة ؟
شُفْنَا أيِِّّ شِي وما شُفْنَا شِي ؟
مِعْزَاتنا كَدَّن للحصى
شُفَّعنا بيَّتُوا للقَوَى !
وجع البطون
درن العيون
الهلْوَسَة
موية الغنم والدود وموية الناس سَوَا
المستراحات
الخَلاَ
الله يجازي الكان سبب
ما نلْقَى عافِي ولا دَوَا
ما نلْقى غير النسْنَسَة
وكاوِيقْ كلام شالو الهَوَا
حال ماها حال
حال ماها حال
وقْعَتْنا تبقى على الجبال
غلُّوا البضاعة العِنْدُو سِلعِة عِرفلها
غلُّوا القمح
غلُّوا اللحم
غلُّوا الخَدار
حتَّى الملح !
دسُّوا اللبن
دسُّوا العَدس والصلصة
دسُّوا الإسبرين
دسُّوا المعايش كلَّها
حاكومة وين واللجنة وين في عديلة راكْبَة محلَّها
اللجنة حلَّيتا
المصيبة الجامْدّة شِنْ بِيَحِلَّها ؟؟
حال ماها حال
وقْعَتْنا تبقى على العدو الفيها تبقى على الجبال
قَدَرْ الله يا بِت الحلال
لع يا العَشِي
قَدَرْ الرجال اللاب تخاف الله وتتوب لا بتِخْتَشِي
وأنا لجْنَة غرَّقت البلد أرجع وأجيك بي يات وشِي
وغلاّ البضاعة الْفِي إيدُو مفتاح البضاعة
الأرزقي المايِصْ عَرَقْنا ومِتْحشِي
وما ضرَّ غير أبَّان دقون فيها الضلالة معشْعِشِي
وفِقَراً تَغُشْ في الله تخُشْ بيتو وتسرْقُوا ورا العِشي
كُرْ من ضمير ناس هان قَدُرْ تجْلِب بِلاده وتِتْرَشِي
كُرْ من عَوَارْضِك يا بلدنا الناس تَشُوف ومَدَعْمِشِي
تسمع سماع ومَطَنِّشِي
وحاكْمَانا في شنو وشان شِنُو ؟
حاكُومة ما خابْرالنا شِي
حِسْ أمَّها المَهَرِيِة همْ ، يجي من بعيد
يا أمُّونَة بتِّي شِن الشَكِي
ما حاشُو في الطين الرُخُسْ
ينحاشلو ف أرْضِ مَكَرِكِي
حَرْمان عليكي تقولي لا
مجبورة يا خادْمَ الفَكِي مجْبُورة إنتِي على الصلاة
لا تأذِي جرحو تحَكْحِكِي
وجاييك مَلَكْلَك من تِحتْ
يا أمّونة تاني تَلَكْلِكِي
شيلي الحَرف داك رشْرِشِي
قوم يا عشاي قوم للعَشي
قوم واِنتَكِي
وقام واِنتَكَى
ويلقى الحسن في صفْحَتو وقِدَّامْ وَشِي
إن جيت بلدنا إنكسِّرت
أيِِّّ آآ الحسن
كَسَرَا البحر ؟
أيِِّّ آآ الحسن
يابا البحر دا بحرْ بلدنا
أيِِّّ آآ الحسن
الزول يكسِّر بلدو ؟
والضو سكَتْ
طقْطَق أصابِع ولدو
فِسْْ تنجِلِسْ
فِسْْ تنجِلِسْ
يابا المدارس اندمَّرت ؟
صاح والجوامع اِنكسَّرت ؟
أيِِّّ آآ الحسن
يابا الجوامع هيل مِنُو ؟
هِيل الله نُــوم
هُو الزول يكسِّر حقُّو كيف ؟
والضو يَطَلْوِحْبُو اِندهاشْ ما يلقى قيف
لا بانلُو بَرْ
وأمُّونَة صُوتا من البعيد
نوم يا قَشَرْ
صِحْ يابا في الجامع جا تمساح واِنبَطَحْ ؟
أيِِّّ آآ الحسن
يابا التماسيح مسلمين ؟؟؟؟؟؟
لع مجرمين
لابسين دقون لافِّين طِرحْ ( شايلين سبح )
ما تَضْرَبُوهُن بالسلاحْ وتَكَتِلُوهُن تاحْ تَرَحْ ؟
والضوْ سرحْ
وأمُّونة صوته من البعيد حَلِقَه إنجَرَحْ
نوم يا قَشَرْ
نوم قبْل أجيك
يابا البحر دا ولَدْ مِنو ؟
ولد المطر
ويابا المطر
بت السحاب
ويابا السحاب
خير للبشر؟
ويابا البشر
هُول ربَّنا
وأمُّونة تجري من البعيد يقطع كلامو وتنْحَسُو
تَجْبِدْ أضانُو وتقْرُصُو
لا تقْلِدُو جيب القَشَر دا علي رفاقتو نرَقِدُو
أمُّونة هَزَّتَا تمْغِسُو
أنا دايْر أنوم في صدر أبوي شان البحر
وقام إنحشر في صدر أبوهُو وحدَّثُو
في مرَّة جُونا رجال كبار كبار
غَمَتُولِي في إيدِي قروش كتار كتار
أمُّونة شالتا فنَّتا
الراجِل أبْ دِقناً كبير صرّاله دنْقَر لقَّطَا
وأنا قُم بكيت
أمُّونة فكَّت صُرَّتَا وأدتني صندوق بسكَوِيت
بعدين سَكَتّ
وأمُّونة قامت شَو بَكَت
وتلْفَح نعالَه وتَفْلَعُو
نوم يا قَشَرْ
نوم قَبْلَ أجيك
أنا داير أنوم في صدر أبوي شان البحر
وقام إنحشَرْ في صدرَ أبو
ونام الحسنْ في آخر المسا
وصنَّت عيون النوم يجيها بعد تعَبْ
سرْسارو داخل المدرسة
والضو غَمَد
صِحَى بِي صياح الأمهات وأطفالَه مِنطلْقِين بِكِي
كل فردِة تبكِي على بلد
بكَّاهَا حِسْ الطائرات
والضو ضحك
لمَّا البنات قالَنلو طُقَّهَا بِي حَجَرْ !
يا الضو تَطُقَّهَا بي حجرْفي الجو
تَرمِّي لنا الخِيام
يا قطْرَِةَ التَرَاكُومَا
يا سكَّرْ
دقيق
ومعلبات
ومنام منام
جات البلد تَعَتِبْ جراحَه مَسَبَبات
لون القمح
طعم التُمُرْ
ريحةَ الطَلِحْ
ضُل البرندات القُدام
البُرتُكان والمنقة والليمون
يجوهو منام منام
طُورِيْتُو فِطْنَ الكونْشِبِر مرْكُوزة تالا السام
تجيهو منام منام
المُشْرَع
البنْطُون معَدِّي
ودوْشَةَ العمال تجيهو
منام منام
الروضة والأطفال
بنات الإبتدائي
العام
تجيهو منام منام
الشارع الوسطاني والزاوية الَسَلام والناسْ
يجوهو منام منام
الصَفْقَة والطنْبُور
ووِزَّاً عام
يجيهو منام منام
الناس تقاومْ في البحرْ
مرْيُوقَة مِتْماسكِين تمام
في القيف يجوهو منام منام
الأرْزَقِي أرباب البنوك شُلَّةْ حَرامِيْةَ الضلام
المُلُّسْ
السادة الكرام
لافِّين عليهُن زي غَفَر قاشْرِين
يجوهو طُمام طُمام
السُوق غَلاها
الشُفَّع الأيتام
يجوهو دِيوش دِيوش
وبلا قروش
اللجنة
تجَّار الرصيف
المسْخَرة
الهدَّام
يجوهو كروش كروش
والضو يدُوش !
أصبح صباحِك يا البلد
واللاَّ العَفاريت أصبحت
يصْبِحْ صباحِك يا البلد
تَبْرِي وجرحْ بالك برد
والضو يعافِر في الجبل
مرُّوبُو سابع يوم وِلاد
يا الضو حمارْتكْ طفَّحَت
أمِس الكلاب بَعَجَنَّهَا
كلبةْ مدينِة وديكا عِيك
دحشك معاهُو دحيش غريب
خلِّينا فوق قوز الرماد
أدِّينا عيش وصبيط تَمُرْ
يبقالو زاد
إسبوع يعيش كان الله اراد
أنا بُكْرَة صادْ كان الله راد
والضو خنس قنَّب حكَى
حكَى للوِلاد قصَّة تساب كم واربعين
حكَى بي مَغَسْ
كيف جِدُّو فات الدنيا
فاكر الإنجليز ضربُوا البحر بالطائرات
شان يشْرَق المشروع يموت والأمَّة تنْشَتت شتات
قال وإنتكَى
" الإنجليز أذنابَه في
وكم وأربعين مويات وجات"
صنَّة و بكى
بكى ما بكى
بكَّاهُو حِسْ الطائرات
بكَّاهُو قُدْرَتُو تنتهي
بكَّاهُو يرْجَى المعجزات