هاشم
جايي أغنِّيها وأقول
طيبة زي قولة سلام
قاله تربالاً دغيش
لي مراكبيةً تجول
شاله كف الموج بشيش
لي بنياتاً بيردن
تمّن أزيار السبيل
ومدّن إيدن كورا .. كورا
رشرشن قلب الشتول
أدّن الطيّانة دورة
وشويمن تالا المدارس
خدَّرن كل الفصول
صفقّن هلا يا حبيبة
جايي أغنِّيها وأقول
طيبة جبّارة خواطر
وجنَّها الريح التطفِّر
للعصافير التكاجر
ما تعشعِش إلاَّ وين
في الحراز اليومو ماطر
ولاَّ بين سمرة النخل
التقدِّم تالا باكر
وكت أكون صبحان مسافر
زادة ليّا معَ الزوادة
صنّة بسمعا في البنادر
ماب أقول لك ما تساهر
ساهر السهر اليفيد
لاب أقول لك ما تظاهر
وإنت هسَّع كم شهيد
ماب أوصِّيك وإنت شاعر
تبقى عشرة على القصيد
تدِّي يوم الليلي باكر
أدّك الأطفال نشيد
إلاّ أقول لك أوعى حاذر
أحذر أولاد الحرام
المطاليق
المساليط
الخواذيق الضلام
وأحذرك صنت قبالي
وقمت تمِّيت الكلام
جايي أغنِّيها وأقول
داخلى فيِّ عديل وهيطة
زي وهاطة النيل وبرضو
مارقي منِّي هديل موالف
زي ولِف تربال على أرضو
علّمت شفّع غناي
يبقوا آفة متين ويرضو
وناس سمح جيبو ومجبّر
برّة داراته آب يعرضو
عرفتني على الفقارى
قالت إخواني الكبار
المظاليم الحيارى
قلت أخيّاني الصغار
أمِّي قالت أبوي مسافر
إلاَّ نومته بي مرارة
تصقع الحجر آعمارة
أرفع الحجر آعمارة
ولمّا تاوق بالعبارة
بي قدح مونتو وجسارتو
شفتو واقع من عمارة
القدح بي مونتو روّح
أمِّي ما لقت الجسارة
إلاّ وكتينا الكبرنا
وأدّت البلد البشارة
ويا بلد جيت مبتليبه
جيت أغنّي المن عيونكن
يبدا يومه وينتهيبه
التشيل الليل تذاكر
أو تفاكر في حبيبه
ينقطع ضهر القصائد
عند مريقته من وشينا
حلّة قرية مدينة ميناء
تمشي فوق أتره الغناوي
الأناشيد التقاوي
بالمواويل والحكاوي
سكة الجوع الخرافة
وتنتحِن لهة المسافة
ينقطع ضهر القصائد
الأناشيد الغناوي
المواويل الحكاوي
ينقطع ضهر المسافة
لمّا تقفرا بالمواكب
منصهر بالدم هتافه
والمواكب ما تجيبه
ينقطع ضهر المواكب
الأناشيد الغناوي
المواويل والحكاوي
ينقطع ضهر الحبيبة
وما تسيبه
جنّها وجن المهازل تتبرج
من إذاعات هراء
وجرائد إمِّعة
والدواخل تتفرج
في طنين الرؤساء
اليكفّي العالم التابع
موتاً ودماراً وفناء
تكفت الرادي وتذيع
لا دواء
أيها المرضى
لدى الزمن البنوكي
العتلي الذنيم
لا عليماً بك غيرك
كصغار الشعراء
أنت تنتفخين برداً
أو شموساً محرقات
وعواء
أنت تمتلئين هذا العام
جوعاً أو خواء
أنتِ ترتعدين صيفاً
يا بيوت الفقراء
أنتِ تحترقين
حتى أن يجئ
من يحيل النيل قسراً
نيل ماء
وينطلق ضهر القصائد
الأناشيد الغناوي
المواويل والحكاوي
بالحبيبة الخيرا زائد
ينطرح وجه الغلابة
يا إذاعات يا جرائد
والبلد فوق اللمليس
انطرح في خاطر باكر
وجيت أغنِّي لكم حبيبتي
إلاّ يا غبش العساكر
نتَّفت عصب الكمنجة
وصادرت منِّي الدفاتر
دخلت فيِّ الطبنجة
فرَّ من رأس غلبي شاعر
وركَّ فوق كتف الكلام
والعيون كانوا المحابر
هرَّب الشوق الحرام
من بيوتاً في المقابر
لي شموساً في الظلام
هاشم الأخضر سلام
التحيات النواضر
نبدا بي مين الرسالة
ونبدا من وين يا رفيق
عازّة فوق قيف البداية
وإنت في آخر الطريق
وإحنا بيناتكم محاصر
شوقنا بالريح والحريق
إحنا بيناتكم نصارع
زيّنا وزي الغريق
مرّة نمسك في المياه
مرّة في ضل الوطن
مرّة في عيدان حزينة
زنّت الريح في البحر
فنّت الريح من حراز
لما فطّاهو المطر
مرّة نمسك فينا آه
يا بحر مأساتنا آه
يا بحر مأساتنا بس
يا بحر مأساتنا فيق
يا بحر مأساتنا أوسع
أوسع أسّع ولاَّ ضيق
يا بحر بي غادي هاشم
هاشم التحراهو مين
هاشم الشكّعت فوقو
ريحك المزّع شراعو
موجك الصادربو شوقو
طوقو والزمن القضاهو
تالا هم باكر مسافر
ما رجف ساعة وداعو
هاشم السوِّيته فيهو
وسبتو يضرب بي كراعو
ما غرِق غرقت مراكبو
هاشم الأخضر ضراعو
ما يبِس يبست هدومو
ما حرق شومش شعاعو
وبقَّ كالحلم المصوبر
في الخواطر كوم أماني
هاشم العشم المعتّق
في خوابي الجوف أغاني
يا بحر تحراهو مين
يا بحر بي غادي زولاً
ماب ندلِّي الإيد بلاه
إيدو في إيد الرفاقة
وإيدو بي جاي في الرسن
ماشي في خاطر الغلابة
البيفصح والرطن
سار مقوِّنو التعابى وجايي
قاصدك يا وطن
والجا قاصدك كالزمن
ماب يصدنو العوارض
لاب يهدّنو المحن
ويا محن هاشم قمحنا
فأسنا كراسنا وقدحنا
هاشم المجروح جرحنا
هاشم الفرحان فرحنا
نلقى في زينّا وسمحنا
يوي وسي نغماً صدحنا
وفي ترحنا صبر ملحنا
نلقى في كل المراتع
في المزارع والمصانع
إيديه راية وفجر فاقع
في المدارس والمسارح
في البيوت فطن الشوارع
في الكنائس والجوامع
نلقى في كل المواقع
هاشم القاصدنو نحنا
هاشم الأخضر ضراعو
ما وقع يا نيل في فيضك
وإنت ماب يغباك شراعو
هاشم السمح المعافى
هاشم التسلم خطا
ويسلم الدرب الخطا
هاشم الكم لله أدّا
والبرادى تدور غطا
وشن غطاها بلا غطا
هاشم الحسن العطا
هاشم الحسن العطا
هاشم الصاح يا خطا
هاشم الحسَن العطا
سافر قبلنا وقلنا ليه
يا ماشي للوطن الوسيع
يا ماشي يا كم زول يجوا
يا جايي بي كم زول مشوا
يا ماشي في كم زول تصل
رسِّل سريع
وبلِّغ سلامنا
الشوق فظيع
سلِّم على المحجوب
وجوزيف والشفيع
سلِّم على حلمك محمد والمسيح
سلِّم على نفسك يا هاشم
ود جميع
من فات يوقِّينا الخطر
من قولب الحر والصقيع
بيناتو شان يطلع مطر
أو يحضن العالم ربيع
الناس بترحل قول لو ليه
شان حق يفضِّل ما يضيع
الناس بترحل كل يوم
والحق معاهو على العموم
الناس بترحل وماب تضيع
والحق بيفضل وماب يضيع
الحق حيرجع يا بلد
حقِّك حيرجع ليك وبيك
قوليها وإحنا معانا حق
الحق حيفضل يا قطيع
نتلاقى فوق قيف الفجر
بين التيقظ والهجيع
ويا إنتو يا نحنا
يا نحنا يا إنتو
يا أبّان ضميراً تاه
نتلاقى يوماً يوم
وبيناتنا حد الله
ويا إنتو يا نحنا
يا نحنا يا إنتو
يا نحنا يا المحنة
محنة
محنة
إحنا