مِرْق الحلم
ــــــــ
أيْوا بحبِّك حُبَّاً جَمَّا
وياما بعزِّك
يا نادُوس
وساقات حنِّك فيهن منِّك
ومنِّي الِمشِِّّق
والقادُوس
يا ضَرا مِرْق الحلم الواحد
من شَرا ريح الزمن السُوس
خيل العشق الخابِّي تناهِد
جايي تشوفك
وإنتي عروس
فأله هديرالناس الصاعد
يطوي هجير الأسَف البُوص
ضُمِّي عليها حنان الساعد
جمِّي حشاها الهرَدُو البؤس
خلِّي غنانا البات منباعِض
يغزََر ، يدمي الليهو يدوس
يبْعِد عنِّك شرَّْ العارض
كُلْما نقرِّب يا نادوس
وكل البفْهَمُو فيك يا بلادي
وهادي الدنيا وساسَ يسُوس
البي غادي الشاقَّ الوادي
يبقى تركتر
مُو مجروس
يُمّة كفانا .. بِلد جبّانة
ودود الآفة الفيها يلوص
دايرين نحيا .. ويربى جنانا
زرْعة عِِينِة وماهُو بَرُوس
كلُّ بلد ترفع تبّانة
ونبني العالم بيت جالوص
لافي نخيلاً تطْرُشُو دانة
لا مِِن لغماً تِحْتَ أبنوس
وتبقى الدنيا صحيح دنيانا
والبني آدم دون كابوس
...
وتلْكَ النار الهاردي حشانا
نار الشوق لي أُم بتعُوس
أُم الناس العلّت شأنه
بي عود شمعة
وخيط فانوس
نارنا عِشق والله أدانا
قلباً وافي
وصافي نفوس
وياما نَفَََسْنا طويل ....
وخُطانا
قَدْرِ مسافتك يا نادوس .