ارضا نفاق
حديث وحوار مع حميد
(( العطا على العطا - البركل ))
ايا الحميد
ايا الزول الطراوة هواء
وممدد فى رئاتنا نفس
ايا الصوت الصدح جوانا
ويوم راح صوت صدانا خنس
يوم كان الشعر محتل
قصاد كل بيت قصيدة حرس
زمن كان القوافى تموت
بينات ايد رقيب ومقص
يوم كان السمع طرشان
زمن كان الطرش اخرس
يوم كان البلد محتاج
وساعة الحوجة كانت امس
للولد الخزين الوخرى
للدوغرى الشجاع وكلس
اذا نهمو المنادى ينط
واذا هاجس المنادى هجس
اب قلبا مغطى حجر
يقول كل الكلام فى نص
عشان يصل الوطن للميس
ويكون هادى الوطن ميس
وعلى بر الخلاص يرسى
و من وجع الوجع يخلص
نشوف العافية فى كل زول
مريض مشى اسبتالية فحص
كشف صرف الدواء المجان
درب وحقن حبوب والمس
مافى نهائى شلل اطفال ..ولافى ملاريا
ولا حالة جزام وبرص
شوارع هادىء ..
رغم الحركة قاطعة الحركة
قبال ما يقيفوا الناس .. يقيف البص
الخمسطاشر رغيفة جنيه
سعر كيس الدقيق يرخص
طاعمة الكسره فى كل فم
وسماحة القشرة فى الملبس
الشافع اليتيم طالب
دخل داخل الفصول ودرس
مدرسة ميرى بالمجان
لاها الخاصة ولا فى حصص
رسوم الامتحان مافى
اذا للامتحان هو جلس
نبيه ناجح من اولى .. يجى الاول
جاب اعلى النمر احرز
عطمة قدل قرأ الجامعة
وبعد ما اتخرج اتخصص
مجالات الشغل قدامو
امام عينو الوظيفة فرص
شويتين مافى يتوظف
سنة .. سنتين .. عقد .. عرس
خزين بقى للتعابه ضهر
على جيهة الغلابة عصر
تملى كده وياهو كده وعلى كده بس
زول وطتى
وماسك فى الوطن ده قوى
ولهذا الوطن قدس
زيو وزى رموز وطنو
ومتل ما اتميزو اتميز
لا قبلى ولا جهوى ولا فئوى
لا مال جاى ولا مال جاى ولا اتسيس
سوداتى و وتعددى حر ديمقراطى
حقانى يقول رأيو وبحريتو يتنفس
رجال الامن اصحابو
وعساكر النقطة والمركز
علاقتو قوية بالرادى
يحضر النشرة والموجز
ايا الحميد...
منو اليومداك ....
منو الغيرك وبلاك ركز
تلاتل الامن والتحقيق
وحراسات ياما فيها مكث
لا لانت ارادتك يوم
ولا ذات مرة اتجرس
لا رمش الرمش ذات يوم
ولا جبل الجفون اهتز
لا انتاوقت لا انضاريت
ولا يوم لى غنيمة غمز
وبلاك منو
منو الكان بالبلد مهموم
يوم كانت ملانة هوس
سواقى القافية يوم قطت
تقول فى الساقية مافى الس
ويوم سكت الشعر صنه
صداك رنه .. ورغم الرقباء والعسعس
قوافيك فى الخلاوى آذان
تجلجل فى الكنيسة جرس
تنادى تنادى ديفيد وجون
يقدلو مع معاذ وانس
ايا الحميد
ايا الزول الوطن بيتو
وجميع اهل الوطن اهلو
ولا بين زول وزول فرز
شماليين جنوبيين وغرابة .. وبجا وخاسا
جعليين ونوبيين .. دناقلة محس
ايا الحميد
تعال يا اخوى
قبل مانحكى نتونس
اعلقلك وسام الموت على صدرك
وشاح من حب حفيظة خرز
شهادة انتماء وحضور
تظل فينا الى يوم الخلق تبعث
واقولك قول
دموعنا عليك ماكانت دموع احزان
كانت نز
منك ولينا نسقيبو الحياة الحية
ونسقيبو الممات الحى
يخدر فى عروقنا تبس
واقولك قول
بعد صنت رياح الزيف
وهبوب الارزقية كرس
وليك بقول
وبصوت عالى اتحدث
عن الباقى الوراك بقى
عن الشىء البى وراك حدث
بعد يا اسد القوافى مشيت
الف ورل وراك عبث
وعلى ضهرا
عدد ما شال وخت فقر
وحد ماشال وتاتا فلس
على ضهرك
طلع اتسلق ابو سفيان
واخو سفيان
ولد سفيان
وكتاااااااااار وكتااااااااار
وراك قبضو القروش بالدس
وكل واحد عرض بشر
بعد قبض الغنيمة رقص
بصن حميد ..
يصن ويقول.. ويقول ويصن
اذا الوطن الكبييييير ده نقص
اذا الوطن الكبيييير ده نقص
اكيد واكيد..
اكيد بعض الرقاب تتقص
ا
واوصيكم واوصيكم
اذا ذات يوم شوفتوهو الفباش املس
اصبرو وبس
واصمدو بس
بعد ليل الخداع والزيف
يبق الضوء .. يبق يضوى الضلمة قبس
واوصيكم
اوصيكم
اوصيكم
وبس
وبس
وبس