زَبَدْ زِيف الدَوار

يا زبد زيف الدوار طلَّ بعد التوهة قيف
...
والحمام المرّة طار
ركَّ فوق كتف النهار
شرَّ فوق النسمة طيف يبَّس الدمع الزريف
شوقو حار باللهفة طار
شال من الشمش الحمار
لوّن الكون الهديل
فرْتَك الزيفة الغمام رشرش النغم الوريف
ردَّ للجرف الخدار
مدَّ للأرض الخريف
دوزن الخيل الصهيل
رقّصَت عازّة الخليل
صفّق الطَرْفي الصغار كيَّف العصفورة كيف
بين فََرَقْةََ الليل وسيف
نام على جنبينو تار
بينو والنار ، الصريف فرَّ للفجر المضار
مريل النيل الأصيل
قيفو سوّى الصحرا بار
فرَّق البُكرة .. النضار
بتَّقوا أعواد الصريف وانطفت نار النزيف
لا مكاجرة لا نقار
لا متاجرة بي شعار
القَمِيرِي .. نَقِِذْ حٌوار قصَّ قبّة شيخو زار
يا زبد زيف الدوار
كلُّو ينتهي بالحوار
...
لما تنساب المودة
تلهو وردة مضاحكي وردة
يزهو زهر الأعتذار
والقلوب تصبح فواح من محبّة ومن سماح
في شفافيّة وصراح
ماهلة كالوطن البراح
خِفِّي يا غنوات أجاويد يا أناشيد طيري طير
بالمسادير .. بالطنابير ..
رنّة أم كِيكِي .. النقاقير ..
نقْرَة الطار .. هردة الزار
قولوا خير
بالعصافير .. ناي عتامير
طبلِ بين غابة ومزامير
كلِّ ما مِن شانو
يشحن قِِرْبَة الجوف بالأسارير
قولوا خير
... جملة يا أمّات أبشْرِن بالقِميرات البيأتن
بي حياتن
والسيوف عرضن حلاتن
فوق خيول العِزْ غلاتن
يلصف الدمُّور ، حرير
الزغاريد .. البلاليل .. التغاريد ..المواويل
النسيمات اليتاتِن .. الغمامات اليهاتن
البشارات اليواتن..
الإشارات الكرامات .. السلامات
الكليمات .. يا حلاتن فوق لهاتن
تيّة كيف ؟
حُمد أًحمد؟ سبتو كيف ؟
أبكَّر ؟ أُوهاج ؟ جوزيف
أم سِعِد خلّيته كيف .؟. البلد كيف ؟ الديار .؟


بينه بينكن لا الحصار
لا الجواسيس الكبار
لا الأباليس الصغار لا المطاميس العكار
لا متاريس لا جدار
لا فواصل .. إلاّ جار ..
لا تلاتل لا دمار
لا مشانق ، لا خنادق ، لا بنادق ، لا نزيف
بينه بينكن كَم مطار دَرْبِِ واصل كم قطار
شوق يلهْلِب في الرصيف
هيي سلام ،، من زول رهيف
بينه بينكن كل مزار
يا صباح العُودة بيكن ويا سماح الفُودة
لِيكُن خيِّراتكن والثمار
ضُمُّوا شوق نيلكن عليكن
انطرحلو البكرة بار سلَّك الجرف الشعار
العصافير استخارت واستجارت بالخيار
كتْمة الجَوْ الكجار تصفى بي نسمة هزار
بالتباشير ..
لما طارت ركّت أطفاله الصغار
روحه غنت ما تمنّت
لما حنت ، ليها كل الكون تصنّت
لمّا صنّت ... غنت الناس الكتار
لو في أيدك زيف دوار ما في إيدك إلا نار
ماب يفيدك
صيف في صيف ماب يزيدك غير بوار
طول عفارك للنزيف
...
احنا في إيدنا الخريف
ونيل متمْسَح ماب يقيف
أيْ على كيفنا البذار العشم والإخضرار
احنا بي ايدينا السلام
ايد تدلِّي الكلمة سيف وايد تعلِّي السيف كلام
يا زمان الانكسار ، احنا فينا الانتصار
أيوا ورِّينا الحمام وين بلُود عيشو الوريف
وطار مَسَك درب النهار
يا حمامة مع السلامة
مع السلامة وبالسلامة
تمشي بي درب السلامة توْصَلِي الناس العشامى
وانت يا كُبس القيامة ـ معاك سلامة
يا بقُس ليل الدوار
الحرِب لازم تقيف .
وتاني زرقاء اليمامة ما تشوف شدراً يسير
إلاَّ لافوق
فوق تسامى
زي سماحة الزول نضير
وقام حجر بتَّ الرسول لوّن الغيم بالوسامة
وبابتسامة هي الخريف
تنقَرِع ريح الدمار
وينتهي الزمن
النزيف
يبتدي
الوطن العمار
وينكفي الهوس السخيف
يا ميامين يا كتار يا غلابى الدنيا كيف
قدْرِِ ما وسعت بحار في النهاية بحوشا قيف
لمّا فوق الواطة نقعُد ,, فالحرب تفتُر .,. تقيف.